By continuing, you are agreeing to our Terms and conditions as well as our Use of Cookies.

Volstruis-frikkadelle met Swartkersies

Volstruis-frikkadelle met Swartkersies

Bestanddele:
600 g volstruis-maalvleis
Sout en peper 
1 blik ontpitte swart kersies 
100 ml Pinotage
50 ml Roosmaryngeur druiwepitolie
6 ryp rooi vye

1 pak jongspinasie 
1 pakkie pieterselie 
1 pakkie basiliekruid 
1 E First Choice botter 

Metode:
Verdeel die vleis eweredig en maak kleinerige frikkadelle. Braai dit bruin in die Seedoil Roosmaryngeur olie. Gooi die kersies en wyn by. Snipper 2 van die vye daarby in en plaas in ‘n warm oond (190 grade C) vir 30 minute.

Maak diep kruise in die oorblywende vye en plaas ‘n klontje botter op elk. Skakel oond oor na rooster en plaas die vye by die vleis in die oond.

Stoom die spinasie en kruie net-net sag, geur met botter en ‘n bietjie Roosmaryn- of Rissiegeur Seedoil druiwepitolie. Verpulp goed.

Bedien die frikkadelle op die verpulpte groente en garneer met geroosterde vy en kersiesous.

Skulpie-pasta met Romerige Skelvis en Mossels

Skulpie-pasta met Romerige Skelvis en Mossels

Bestanddele:
400 g gerookte skelvis (haddock)
1 blikkie gerookte mossels
1 bossie spriet-uie, wit gedeeltes fyn gesny
1 K witwyn
1 K First Choice room
Basiliekruidblare
Pietersielie
50 ml Suurlemoengeur Druiwepitolie
1 pak (800 g) skulpie pasta



Metode:
Kook die pasta tot net sag en verfris dit onmiddellik in koue water. Hou eenkant.

Sny die vis van die velletjies af (indien verkies) en dan in blokkies. Plaas die vleis saam met die gekapte sprietuie en olie in 'n pan en maak liggies aar. Giet die wyn by en laat opkook. Voeg die mossels en room by. Roer goed deur en laat indamp vir so 3 minute. Roer die pasta versigtig by die sous en bedien warm. Garneer met gesnipperde Basiliekruidblare, pietersielie en die gesnipperde groen deel van die sprietuie.

Filet Mignon(Varkfillet) met Pikante Amandelsous, geglasuurde wortels en eenvoudige roketslaai

Filet Mignon(Varkfillet) met Pikante Amandelsous, geglasuurde wortels en eenvoudige roketslaai

Metode vir Varkfillet:

Maak seker al die seningrige harde wit stukkies is afgesny van die kant van die filet. 
Sny medaljes van so 5 cm elk. 
Sout en peper. Rol die filetstukke in sout en peper op ‘n  bord om seker te maak dit is eweredig versprei. 
Rol elke filetstuk in meel. Skud ekstra meel af.
Smelt botter en ‘n skeut olie in ‘n medium-warm pan.
Braai filetstukke ongeveer 3 minute aan elke kant.
Sit nou die smalkant van die filitstukke op bodem sodat dit oraloor braai. Ongeveer 1 minuut.
Verwyder kleiner stukke en los die groter stukke nog ‘n bietjie in die pan. 
Dit moenie brand nie. Net mooi gaar word, goudbruin aan die buitekant en sappig aan die binnekant.
As jy nog nie reg is om te bedien nie, plaas vleis in ‘n oondbak voorverhit tot so 150 grade. 

Bedien met pikante amandelsous, geglasuurde wortels en ‘n eenvoudige roketslaai

Pikante, romerige Amandelsous(Renette se voorstel!)

Bestanddele:
5cm/duimgrootte knop vars gemmer, rof gekap
1 k gladde amandelbotter
 2 E varsuitgedrukte suurlemoensap
1 E heuning
1 t gerookte paprika( daai fancy blou blikkie van spanje – dit maak nogals ‘n groot verskil aan die smaak)
¼ t rooipeper
Sout
Varsgemaalde swartpeper
1/3 koppie yskoue water

Metode:
Kap die gemmer fyn in ‘n voedselverwerker op die polsfunksie. Gooi water eerste in voedselverwerker. Anders sit die amandelbotter aan die bodem vas. Voeg die amandelbotter, suurlemoensap, paprika, heuning en rooipeper by die water en verwerk op die polsfunksie. Voeg meer water by per eetlepel vol om die sous te verdun soos nodig, totdat dit mooi glad is. Onthou om die kante van die voedselverwerker af te skraap om al die bestanddele lekker te meng. Voeg sout en peper na smaak by en pols weer ‘n paar keer. Proe hoe dit smaak en pas sout en peper aan na smaak. Jy kan hierdie sous tot 3 dae voor die tyd maak. Hou dit in yskas en bring tot kamertemperatuur voor gebruik. As jy dit bietjie meer byt wil gee, gebruik meer rooipeper. Vervang die heuning met Esdoringstroop(maple syrup) om hierdie sous veganisties te maak. Jy kan dit gebruik by enige gebraaide vleis, oor geroosterde groente asook as slaaisous. Vir slaaisous kan jy nog yskoue water byvoeg en dit meng tot weer glad en dunner en giet dit oor jou slaai!

Geglasuurde wortels met pangeroosterde amandelvlokkies

Bestanddele:
½ k Amandelvlokkies, rou
30 g botter
800 g babawortels, geskil en mooigemaak
2 t fyngerasperde lemoenskil(zest)
¼ t (60ml) lemoensap(druk sommer van dieselfde lemoen vars sap uit)
2 E droë witwyn
2 E Esdoringstroop(maple syrup)

Metode:
Smelt botter in ‘n groot pan en laat die wortels sag kook daarin tot amper gaar. Voeg die lemoenskil, lemoensap, wyn en stroop by en bring tot kookpunt. Verminder die hitte, prut onbedek, totdat al die vloeistof amper verdamp het en die wortels sag en gekarameliseerd is. Voeg vir die lekkerte nog so klontjie botter oor die wortels net voor jy dit van die hitte afhaal. 

In ‘n skoon droë pan, op mediumhitte, rooster die amandelvlokkies. Roer nou en dan sodat die vlokkies oraloor ‘n pragtige bruin kleur kry en nie vasbrand nie en hul geur verdiep.

Bedien die wortels bestrooi met die pangeroosterde amandels

Eenvoudige vars roketslaai

Bestanddele:
Bedien 4-6
2 E Olyfolie
2 E vars suurlemoensap
1/8 t sout
Varsgemaalde swartpeper
 5 gepakte koppies roketblare
2/3 k dungesnyde Parmesaankaas

Metode:
Klits die olyfolie, suurlemoensap, sout en ‘n bietjie gemaalde swartpeper saam in ‘n groot bak. Voeg die roketblare by en roer die vinaigrette deur sodat al die blare bedek is. 
Strooi die parmesaansnye bo-oor en bedien dadelik.

Jy kan die slaaisous tot 5 dae voor die tyd maak en stoor in ‘n lugdigte houer in die yskas. Klits net weer voor gebruik. 

Jy kan ook die parmesaankaas vervang met verouderde kaas. Hoe langer die kaas verouder is, hoe lekkerder. So “mature’ of “vintage”kaas is lipleklekker by roketblare met hierdie eenvoudige slaaisousie.

Cari de crevettes à la Nadine (Nadine se Kreoolse Garnaal ‘Kerrie’)

Cari de crevettes à la Nadine (Nadine se Kreoolse Garnaal ‘Kerrie’)

Bestanddele:
Genoeg vir 6 gul porsies

1.3 kg heel Garnale /1 kg garnaalsterte met skelet- skelet gee en behou great geur na die braai in borrie
200 g uie (+-3) in dun skywe gesny
30 g knoffel fyngekap (braai net 'n kort rukkie anders word knoffel bitter – voeg dus by net voordat tamaties bygesit word)
30 g vars gemmer, fyngekap 
6 skeplepels olyfolie
1 gelyk eetlepel borriepoeier
4 takkies Tiemie
Tamatie-konsentraat
750g fyngekapte tamatie(+-6/7 redelike grotes)
1 teelepel suiker 

Metode
Plaas tamaties in ‘n bak met kookwater. Bedek heeltemal, want dit sal help met die skil aftrek. Sny ‘n klein kruisie onderkant en trek die skil af. Kap in fyn blokkies. 

Braai die garnale in olyfolie in ‘n swaarboompan so 10 cm diep sodat die sous nie oor die rant kook nie.

Wanneer die garnale bruingebraai is na so twee tot drie minute vir klein Mosambiekse garnale. (moenie te lank kook nie, want dit maak die garnale pap), voeg ‘n gelyk lepel borrie by die pan. Roer garnale en borrie goed deurmekaar om die borrie goed te laat braai. Verwyder garnale van die pan, bedek en hou eenkant tot nodig.

In dieselfde kastrol waarin die prawns gebraai is, braai nou die uie, tiemie, gemmer met growwe sout en gemaalde peper (verkieslik wit) in nog olyfolie. Die uie moenie bruinbraai nie, net lekker sag en voeg die knoffel by en braai vir nog so ‘n minuut. Voeg fyngekapte tamaties by en laat prut 10-15 minute. Tydens kook, mag jy dalk ‘n klein koppie water moet byvoeg en klein teelepel tamatie-konsentraat indien nodig. Hierdie sal afhang van die tamaties se rypheid en soetheid. As die tamaties te bleek is, voeg gerus die konsentraat by om die sous ‘n lekker kleur te gee. 
Pas sout en peper na smaak aan en dalk teelepel suiker om die suur van die tamaties te breek. Net nodig as die tamaties nie lekker ryp is nie. Voeg garnale by en kook vir 10 minute. 

Bedien met witrys (Basmati is heerlik) en chillie/salsa bysous. As jy koolhidrate vermy of dophou, kan jy Blomkoolrys hierby maak. Dit smaak net so lekker. 

Chillie/salsa bysous
Bestanddele:
+-12 sprietuie of minder afhangend van die grootte (ek het sommer ‘n pakkie wit salad onions van Woolies gebruik)
1 klein bruinui
4 chillies (soos Birdseye of Thai chillies- brandrissies) kan chillie paste ook gebruik as vars chillies nie beskikbaar is nie
Sout
Vars gemmer fyngekap, so duimgrootte knop 
1 groot lepel witwynasyn
3 groot lepels sonneblomolie/of enige ander neutrale olie soos avocado-olie, Seedoil se natuurlike druiwepitolie. NIE OLYFOLIE NIE

Metode:
Kap sprietuie en ui in fyn skyfies en blokkies. Voeg by gemmer, fyngekapte chillies en sout. Voeg olie en asyn by en maak so ‘n vinaigrette. Los dat dit rukkie intrek sodat die chillie in die asyn/olie mengsel intrek. Bedien as bysous/bykos. Jy kan die chillies uitlos of minder gebruik of die sade uitskraap vir minder hitte na smaak. Hierdie bysous/salsa is wonderlik by Indiese kerries, braaivleis en sommer enigiets anders wat jy so ‘n bietjie wil opkikker.  

Wenke:
  • Hoe varser die bestandele, hoe lekkerder smaak dit. 
  • As jy sukkel om vars gemmer naby jou in die hande te kry, wanneer jy kry, koop baie en so vars as moontlik, krap die skil af met ‘n lepel, en vries die wortels. Dan kan jy net inrasper soos nodig in kos of hierdie salsa
  • Maak die salsa sommer paar uur voor ete of al die vorige dag. Teen etenstyd is dit perfek!
  • Ek het al vars borriewortel gebruik in plaas van borriepoeier. Gebruik maar weggooi handskoene, want wortel vlek mens se hande, maar dit gee ‘n wonderlike smaak aan die sous.
  • Hanteer die chillies versigtig. Moet liefs nie jou oë of mond raakvat na chillies kap nie. (ondervinding)
  • Soos met enige Kerrie is die leftovers selfs lekkerder.
  • Natuurlik nie aan te beveel vir iemand met ‘n skulpvisallergie nie.
  • My man eet nie garnale nie, maar geniet die sousie oor die rys met die salsa terdeë.
  • Ek skil die garnale almal eers af en lek die sous en dan begin ek van ‘n kant af eet!

Calamari-repe Gestowe in Wyn en Tamatie met Bruin Basmati-rys

Calamari-repe Gestowe in Wyn en Tamatie met Bruin Basmati-rys

Bestanddele:
800 g Calamari-repe
Knoffelgeur Druiwepitolie
First Choice botter
1 knoffeltoontjie 
1 K droë witwyn
2 ryp tamaties, in blokkies gesny
6 blaartjies vars basiliekruid opgerol en in repe gesny
2 E kappertjiesaad
1 klein pakkie swart olywe
½ soetrissie in blokkies gesny 

1 K Bruin Basmati-rys
4 K water
2 t sout

Afronding:
Fyngekapte pietersielie
Roosmaryngeur Seedoil Druiwepitolie 

Metode:
Week die rou Basmati-rys in die water vir 15 minute en bring tot kookpunt. Laat vinnig kook vir 12-15 minute. Gooi meeste van die water af. Voeg sout by. Skud die kastrol effens. Bedek met 'n droë skoon vadoek. Plaas die deksel stewig op en laat staan op die plaat met laagste stelling.

Braai die Calamari-repe bruin in die Knoffelgeur olie en botter. Kap 1 toontjie knoffel fyn en voeg by indien verkies. Giet die wyn by en laat opkook. Voeg die tamatie en soetrissie by. Laat stowe vir ongeveer 35 minute. Voeg die kappertjiesaad en olywe by en stowe nog so 10 minute.

Bedien op die rys en rond af met 'n paar druppels Roosmaryngeur druiwepitolie en gekapte pietersielie.

Makriel en Salm Ceviche met Aarbeie en Avokado

Makriel en Salm Ceviche met Aarbeie en Avokado

Bestanddele:
1 pakkie makriel-filette
1 kleinerige liggerookte salmfilet (of forel)
+- 10 aarbeie (3 mm skyfies gesny en dan in dobbelsteentjies gekap)
5 skywe komkommer (3 mm dik gesny en dan in dobbelsteentjies gekap)
3 groterige radyse (ongeveer dieselfde grootte dobbelsteentjies as komkommer en aarbei)
Sap en skil van 4 lemmetjies
Vars pietersielie of koljanderblare, grof gekap
3 E suurlemoengeur druiwepitolie 
Ongeveer 1 ½ K avokado-pulp
1 skyfie First Choice Fetakaas
50 ml First Choice room 

Metode:
Sny die vis netjies van die vel af en in 2 cm grootte blokkies. Meng die vis met die lemmetjiesap en laat staan in die yskas vir ten minste 30 minute, maar nie langer as 'n uur nie. Meng al die bestanddele liggies. 

Verpulp die Fetakaas, room en avokado glad.

Verdeel die avokado op die borde en maak 'n hartjievorm of 'n sirkel. Rangskik die Ceviche daarop. Bedien yskoud.

Beesfilet in Netvet met Drop-gegeurde Bruinsous

Beesfilet in Netvet met Drop-gegeurde Bruinsous

Bestanddele:
800 g heel beesfilet in netvet toegedraai
2 E First Choice botter vir braai 
3 E Seed Oil Natuurlike Druiwepitolie 
1 houertjie biefaftreksel-jellie
100 ml rooiwyn 
3 E Worcestersous 
3 blokkies sout drop (licorice)
2 E klein yskoue botterblokkies

Slaai:
Verskeidenheid bessies soos bloubessies, swartbessies en frambose
1 pakkie rou beetstokkies 
1 klein rooi ui in dun skyfies gesny
Sap van 2 lemmetjies
Seed Oil Roosmaryngeur Druiwepitolie
2 tiemietakkies, gestroop
First Choice pepergeur Fetakaas

Metode:
Verbruin die vleis alkante in 'n warm pan, sonder om die netvet te brand, maar ook so dat dit genoeg vet uitbraai. Gooi die vet af. Verplaas die vleis na 'n oondpan en sit in die oond by 160 grade C om verder gaar te word soos verkies. Toets die fermheid van die vleis, as dit nog lekker sag is wanneer jy daaraan druk, is dit nog ligter gaar. Hoe fermer, hoe gaarder. Verwyder uit die oond en laat rus vir 10 minute. 

Terwyl die vleis in die oond is, gebruik die pan waarin die vleis verbruin is om die sous te maak. Gooi die rooiwyn en Worcestersous in die pan en laat prut. Roer die drop en die bief-ekstrakjellie by. Roer gedurig oor mediumhitte sodat die drop smelt. Giet laastens die vleissous wat vorm terwyl die vleis gerus het by die sous, roer deur en verwyder van die hitte. Roer nou die koue botterblokkies by. 

Meng al die bestanddele vir die slaai saam met die tiemieblaartjies. Sprinkel met die Roosmaryngeur olie en Lemmetjiesap.

Sny die vleis in mooi skywe, skep sous mildelik oor en bedien saam met die Bessieslaai.

Gerookte Salm en Aartappelslaai met Appel, Komkommer en Grenadella

Gerookte Salm en Aartappelslaai met Appel, Komkommer en Grenadella

Bestanddele:
500 g Gerookte salm afsnystukkies, gesnipper
4 mediumgrootte aartappels, ongeskil en sag gekook
25 ml First Choice botter vir braai
15 ml Seed Oil Druiwepitolie
2 groot groen appels, ongeskil, in vuurhoutjie-grootte stokkies gesny
3 jong komkommers, ongeskil, in vuurhoutjie-grootte stokkies gesny 
5 ryp grenadellas
4 lemmetjies
15 ml suurlemoengeur druiwepitolie 
250 ml First Choice room 
1 bossie vinkeltoppe, gekap

Metode:
Sny die aartappels in 10 mm dik ronde skywe. Verhit die botter en druiwepitolie op mediumhitte in 'n pan. Plaas net genoeg aartappelskywe om die bodem te bedek en braai hulle stadig goudbruin aan albei kante. Sprinkel met sout en laat effens afkoel.

Druk die sap van 1 lemmetjie oor die appel en komkommerstokkies. Krap die pulp van 2 grenadellas oor die stokkies uit en meng laastens die suurlemoengeur druiwepitolie deur.
Sprinkel met sout.

Maak suurroom deur die room met sap van 1 lemmetjie te meng. Skaaf ook met 'n rasper van die lemmetjieskil by die suurroom.

Sny die oorblywende 3 grenadellas middeldeur en sprinkel die gekapte vinkel oor elke helfte. 

Breek die aartappels in growwe brokkies. Meng die gesnipperde salm met die aartappels. Skep suurroom onder in 6 mooi borde. Plaas 'n hopie aartappel en salm bo-op die suurroom. Sprinkel die appelstokkie-mengsel oor en rondom die salm. 

Bedruip laastens met sous wat oorbly nadat jy al die stokkies uitgehaal het, rondom die slaai. Garneer met 'n oopgesnyde grenadella-helftes.

Lamstjops met Pruime en Bosbessies

Bestanddele:
6 lamslende-tjops
1 takkige roosmaryn, gestroop en gekap
2 E Roosmaryngeur Seed Oil Druiwepitolie
1 E First Choice botter
Sout en Peper

6 ryp pruime
½ K bosbessies (cranberries)
2 E First Choice botter in blokkies gesny
½ K Jakkalsvlei Merlot

400 g Murgpampoentjie-Spaghetti 
600 g Jongspinasie-blare
4 E First Choice botter 

Hollandaise-sous:
2 eiergele
⅓ van 'n 500 g blok First Choice botter, gesmelt en die skuim afgeskep 
2 E lemmetjie- of suurlemoensap
1 E Seed Oil Suurlemoengeur Druiwepitolie 

Metode:
Steek die tjops se lang kant met 'n tandestokkie in die dik gedeelte vas sodat dit 'n ronde skyf vorm. Smeer die tjops alkante in met die Roosmaryngeur olie. Sprinkel met sout en peper en laastens die vars roosmaryn. Verbruin die tjops in 'n warm pan waarin jy die botter gesmelt het en braai ook die vetkante deur dit met 'n braaitang vas te hou. Plaas in 'n oondvaste bak en laat rus totdat jy dit onder 'n warm oondrooster gaan bros bak.

Sny 'n kruisie aan die bokant van elke pruim en plaas 'n klont botter daarop. Plaas dit in 'n oondvaste bak. Sprinkel die bosbessies rondom en giet laastens die Merlot by. Bak in die oond by 190 grade Celsius tot oopgebars en die wyn en bosbessies borrelend saam 'n sous vorm.

Stoom die murgpampoentjies spaghetti in 'n pan met 'n deksel net sag maar ferm, saam met ongeveer 3 E water en 1 E botter. Hou warm. 

Stoom ook die spinasieblare nadat jy dit gewas het met 'n bietjie botter maar geen water. Verwyder van die hitte sodra dit net-net verwelk en sag word.

Maak hollandaise-sous:
Meng die eiergele en lemmetjies in 'n mengbak wat op 'n klein kastrolletjie pas. Plaas die kastrol half gevul met water op 'n medium warm plaat en sit die mengbak daarop. Giet die warm gesmelte botter stadig by en hou die melkerigheid onder in die botter, agter. Roer heeltyd met 'n ballonklitser totdat die sous dik en blink is.

Net voor bediening rooster jy die tjops bros en bruin. Bedien die spinasie bo-op die murgpampoentjie spaghetti en skep hollandaise sous bo-oor en rondom. Plaas 'n tjop bo-op en 'n pruim heel bo-op of langsaan. Skep die bosbessiesous oor en garneer met vars roosmaryn.
Copyright © Ontbytsake 2020 - All rights reserved.  |  Privacy Policy  |  Terms & Conditions
 site