By continuing, you are agreeing to our Terms and conditions as well as our Use of Cookies.

Fliektyd: 20 Julie 2019

Deur Leon van Nierop

Jy dink dalk: jy het The Lion King al so dikwels saam met jou kinders op DVD gekyk, dat jy huiwerig is om weer daardeur te sit. Maar vrees nie meer nie. In hierdie lewende-aksie-weergawe, waar jy die leeus se asem kan voel en die vlakvarke se knalle kan ruik, styg animasie-realisme na ‘n nuwe vlak. Jy sal tot die wind deur die leeus se maanhare sien ritsel – met elke haartjie wat apart vibreer… Dit mag jou heeltemal omklits. 

Die sirkel van die lewe, van geboorte, deur avonture, tot by die onafwendbaarheid van die dood – dis die tema van die meesleurende The Lion King. Baie mense sien Hamlet hierin, wanneer ‘n bose oom ‘n koning vermoor, en sy seun wraak neem. Maar hierdie weergawe meng komedie, aksie, drama, romanse, hartseer en die bekoring van Afrika uitmuntend. Daar is ‘n balans tussen diere-maniere, komedie, kameraadskap, boosheid en die skoonheid van die bos. En moenie die musiek vergeet nie. Ook die oorweldigende wildebees-stormloop wat die teater laat skud. 

Maar jy moet dit in Scene X-Treme gaan kyk met sy fenomenale klank, of in 4D-X waar die stoele saam met die aksie beweeg. The Lion King is elke sent van sy geld werd. Dis aandoenlik, vertel dieselfde verhaal op ‘n vars manier, en mag jou fassineer. Vat die hele gesin saam.
Copyright © Ontbytsake 2019 - All rights reserved.  |  Privacy Policy  |  Terms & Conditions
 site