By continuing, you are agreeing to our Terms and conditions as well as our Use of Cookies.

Jan Harm se bietjie sport

20 Mei 2017

Jan Harm se bietjie sport

Wat ‘n wonderlike seisoen was dit nie vir die Blitzbokke nie! Met ons 15-man span wat effe rondslomp het Neil Powell se knape die baton oorgeneem en ‘n uitstekende jaar bymekaar geslaan om gekroon te word as kampioene van die Wêreld Sewesreeks vir 2017.

Met ‘n relatief jong span het ons Blitze die reeks oorheers. In die 9 toernooie wat dit hulle geneem het om die titel op te raap het hulle 5 keer as wenners uitgetree en drie keer tweede ge-eindig. 

Dit is slegs die tweede keer dat Suid-Afrika as Seweskampioene gekroon is in die 18-jarige bestaan van die reeks. Sedert ons eerste titel in 2009 was die span 5 keer naaswenners gewees met Nieu-Seeland en Fiji wat ons elke keer getroef het. 

Die Nieu-Seelanders is nogsteeds loshande voor as dit kom by titels ingepalm met ‘n totaal van 12. Fiji het 3 reeksoorwinnings agter hulle naam maar sal nou moet begin loer oor hulle skouers met die Blitzbokke wat slegs een agter is. Geen ander span kon meer as een reekstitel inpalm nie. 

Ons is almal verskriklik trots op ons sewesmanne.  Hulle status as 2017 konings is welverdiend en Neil Powell, Phillip Snyman en die res van span kan met reg ‘n bietjie feesvier. Die harde werk wat hulle ingesit het dra nou vrugte en die samehorigheid, spangees en karakter van die span is daar vir almal om te sien.

Welgedaan manne! 
Copyright © Ontbytsake 2017 - All rights reserved.  |  Privacy Policy  |  Terms & Conditions
 site