Dawie, een van die mees aangehaalde ekonome in die land, is gebore in die Laeveld. Hy was ‘n ekonoom by die reserwebank asook Ekonomiese redakteur van Finansies en Tegniek. Tans is hy direkteur van die Efficient Groep, ‘n batebestuurs-maatskappy in Pretoria. Dawie is `n tipiese Laevelder - gebore in Warmbad en grootgeword in Tzaneen. Hy het sy eerste werksondervinding by die Reserwebank opgedoen. Daarna het hy vir aandelemakelaars gewerk, tot waar hy vandag die Voorsitter en Hoofekonoom van die Efficient Groep is.

Dawie vlieg graag met sy paramotor en is deel van die Suid-Afrikaanse span wat al die land by die wêreldkampioenskappe verteenwoordig het. Op `n persoonlike vlak is Dawie met Marina getroud en het hy twee kinders.

Milan Murray is gebore in Queenstown en het grootgeword in die Wes- Kaap. Sy’t in 1992 gematrikuleer aan Hoërskool Bellville en haar dramastudies aan die Pretoria Technikon voltooi. Haar drama-opleiding is ‘n paar jaar later voortgesit by verskeie ateljees in New York.

Milan is getroud met entrepreneur Schalk van der Merwe en het 4 en `n half jaar gelede vir die eerste keer ma geword. Sy beskryf haar seun Steph as ‘n 'ekstrovertiese bondeltjie energie wat heeltemal te veel na sy pa aard!'. Haar dogtertjie Lua is twee jaar later gebore op die rug van ‘n donderstorm in November.

Milan se tong-in-die-kies boek oor ma-wees, KOEMELAAT, is in 2010 gepubliseer. En hierdie jaar word die boek ook ‘n eenvrou-vertoning met die naam ‘GEFOP’. Sy neem die gehoor op ‘n reis van die eerste drie jaar van ma-wees en vermaak met slim humor en eietydse, komiese situasies.

Milan se verhoog-CV sluit rolle in teenoor Sandra Prinsloo, Gys de Villiers, Neil Sandilands en Andrew Buckland. Sy is tans besig met die verhoogproduksie ‘Vergenoeg’ saam met Sandra Prinsloo. Maar Milan is die bekendste vir haar TV rolle.

Haar loopbaan het begin as Dusty van ISIDINGO. ‘Song vir Katryn’ en ‘Dit wat Stom is’ het daarop gevolg. Toe BINNELANDERS waar die gewilde karakter Frankie, een van Milan se grootste uitdagings was. Daarna was sy ook as die klouterdief in TRANSITO te sien. Deesdae vertolk sy ook die rol van Kate van Reenen in die nuwe Mnet sepie `The Wild`

Ulla Pakendorf het in 2001 Ulla Pakendorf-Loubser geword toe sy getrou het met Coenraad Loubser. Ulla is individualisties, modern in haar kleresmaak en idees maar tog ook ‘n onopgesmukte boeremeisie wat van eenvoud en aardse dinge hou. Soos almal weet, is sy mal oor kosmaak maar kan ‘n pretensieuse koskokery nie hanteer nie.

Kos is vir haar eintlik net ‘n rede om mense bymekaar te bring en die etery gaan oor die geselskap en nie noodwendig die maaltyd nie. Sy het al vele dinge in haar lewe aangepak, onder andere het sy haar honneurs in filosofie, (wat haar kwalifiseer om tot laatnag te sit en nonsens praat), sy het die PUK oorleef en het vir 2 jaar haar eie restourant gehad, Ullala... die kuierplek.

Deesdae het sy ook haar eie klein kookboek, ‘Maak ‘n Hap met Ulla’, wat mens hier op Ontbytsake se webwerf kan bestel. Sy is ook opgelei as ‘supernanny’ wat vir ouers raadgee hoe om hulle kinders te hanteer en enige iemand kan haar kontak vir raad en praktiese bystand. Dan doen sy die allermooiste hekelwerk en maak die lekkerste mosterd in die land.

Ulla is deel van `n groot gesin wat mekaar amper elke dag sien. Ulla en Con het twee seuntjies, Reenen en Rouke.

Jan Harm is gebore in Randburg, Johannesburg, waar hy nog steeds bly. Hy het B.Sc. by RAU studeer en na Universiteit het hy by SAB begin werk as handelsmerk- bemarker. Jan Harm het in televisie beland toe hy ‘n paar jaar gelede by die destydse produksiehoof van Mnet se kantoor ingeloop het en gesê het hy soek werk. Daarna is hy aan ‘n paar mense voorgestel en vandag bied hy nie net weekliks die weer en landbounuus op Ontbytsake aan nie, hy is ook ‘n vryskutredigeerder by Supersport.

Wanneer hy nie werk nie, geniet hy dit om saam met vriende te kuier om ‘n vuurtjie, maar hy is net so gelukkig met ‘n lekker boek by die huis of om tyd aan sy visdam te spandeer. Hy hou baie daarvan om gholf te speel en op wegbreek-naweke na die bosveld of Drakensberge te gaan.

Jan Harm is begin 2009 getroud met Kim en hulle eersteling, Emma, is in Februarie 2011 gebore.

Jan Harm het nou pas ook sy eie cd `Singstories` bekend gestel waarop hy `n hele klompie lekkerluisterliedjies sing en stories vertel oor die goeie ou dae wat `n mens op `n nostalgiese reis na die verlede sal vat. Hy is ook beskikbaar vir Singstories optredes.

Carla van Niekerk is in die dorp, Porterville, in die Swartland gebore en was in Hoërskool Gimnasium in die Paarl op skool. Na skool het sy ‘n B.Ed Graad by die Universiteit van Stellenbosch behaal en is daarna na Londen, Engeland toe om skool te hou. Na ‘n jaar of twee het sy teruggekom en besef dat skoolhou nie regtig vir haar is nie.

Sy het besluit om haar passie uit te leef naamlik televisiewerk en het haar cv na Ontbytsake gestuur met die hoop dat daar moontlik ‘n pos oop is.

Ontbytsake het haar gekontak en sy het onmiddellik Johannesburg toe getrek om aanvanklik in die Ontbytsake kantoor met administrasie uit te help terwyl sy die prosesse van televisieproduksie leer ken.

Carla is ‘n plaasmeisie sonder fieterjasies. Die natuur is haar grootste bron van energie en veral berge het ‘n spesiale betowering. Sy is baie lief vir lekker eet en saam met vriende en familie kuier. Sy het ook ‘n passie vir die Bosveld en die rustigheid wat daarmee gepaard gaan.

Carla is onlangs getroud met Jandré Wessels en woon in Midrand.