By continuing, you are agreeing to our Terms and conditions as well as our Use of Cookies.

Warm Sjokolade-mousse met Kersie-kompot

Warm Sjokolade-mousse met Kersie-kompot

Lewer: 6
Maaltyd: Nagereg
Gaarmaaktyd: 30 min

Bestanddele:
Vir die Kersiekompot:
Skil en sap van 1 lemoen
1 E strooisuiker
200 g kersies, vars of bevrore of gemengde bessie-opsie

Vir die warm Sjokolademousse:
120 g donkersjokolade (75%)
60 g ongesoute botter
6 eiers (geskei)
60 g strooisuiker

Om voor te sit:
Kakaopoeier vir oorstrooi
20 g gekapte pistasie- of ander neute



Metode:
Vir die kersiekompot: 
Plaas al die bestanddele in 'n medium kastrol oor 'n lae tot medium hitte. Kook vir vyf tot 10 minute totdat die kersies gebars het en die sous verminder en stroperig geword het. Verwyder van die hitte en hou eenkant om heeltemal af te koel.

Sodra dit afgekoel het, verdeel die kompot tussen ses bakkies, ramekins of oondvaste koppies en hou eenkant terwyl jy die sjokolade-mousse maak.

Vir die warm sjokolade-mousse:
Voorverhit die oond tot 190 grade, of 175 grade as jy ’n waaieroond gebruik, en rangskik die ses potte op ’n bakplaat. Kap die sjokolade grof en sny die botter in blokkies. Plaas die sjokolade en botter in 'n hittebestande bak oor ‘n pot met pruttende water, maak seker dat die bak nie aan die water raak nie. Smelt die sjokolade en botter stadig saam, terwyl jy gereeld roer. Of jy kan die sjokolade en botter met intervalle van 30 sekondes in die mikrogolf smelt en elke keer roer om seker te maak dat die sjokolade nie aanbrand nie. Sodra die sjokolade gesmelt het, verwyder van die hitte en hou eenkant om effens af te koel. 

Skei die eiers en plaas die eiergele en eierwitte in twee aparte bakke. Begin om die eierwit te klits met 'n elektriese klitser of met die hand en voeg die suiker geleidelik by. Hou aan klits totdat stywe punte vorm. Klits die eiergele effens om los te raak en gooi die gesmelte botter en sjokolade stadig in die eiergele, terwyl jy heeltyd klits. Vou die eierwitte liggies in drie dele en maak seker jy meng nie lug in nie. 

Verdeel die mousse-beslag tussen die bakkies en bak vir agt tot 10 minute tot donserig. Die rante moet koekerig wees maar die middelste deel is steeds sag en sponserig soos mousse.

Haal uit die oond, bestrooi dadelik met kakaopoeier en versier met gekapte neute. Sit dadelik voor.

Vliegtuigkos – Hoender en Beesvleis ‘Wraps’

Vliegtuigkos – Hoender en Beesvleis ‘Wraps’

Aantal Porsies: 6 mense
Voorbereiding: 15 minute
Gaarmaak: 15 minute

Bestanddele:

Beesvleis-wrap:
3 groot Tortilla ‘wraps’
Gladde maaskaas (gebruik dit as smeermiddel)
300 g kruisskyf klaar gaargemaak en in dun repies gesny
3 E basiliekruid-pesto 
1 pakkie roketblare
Rooikool, fyn gesny
Vars koljanderblare
Rosa-tamaties in helftes gesny
1 wiel Feta kaas in dun repies gesny
Swartpeper en sout

Hoender-wrap:
Groot Tortilla ‘wraps’
1 bakkie gladde maaskaas
1 gaar hoender ontbeen en in lang stukke gesny of opgebreek
Baba-spinasie blare
Wit gouda, gerasper
Pakkie songedroogde tamaties 
Soetrissiesous
Swartpeper en sout

Metode: 
Verhit die wraps in ‘n pan, gebruik die maaskaas as smeermiddel op die wrap. Pak elke tipe wrap se bestanddele netjies aan die een kant van die wrap, bo-op mekaar. Vou die wrap toe aan die kante en rol op, sny deur in die middel en bedien.  

Gebraaide Ribeye met ‘n Biltong-Braaibroodjie

Gebraaide Ribeye met ‘n Biltong-Braaibroodjie

Plaat/ Oond Temperatuur: Hoog en 180 grade
Aantal Porsies: 4-6 mense

Bestanddele:

Vleis:
500 g Ribeye
Olyfolie, vars suurlemoen sap, sout en peper om te geur

Braaibroodjie:
Een hele Witbrood (dik snye)
Smeerbotter
250 g Cheddarkaas
250 g Mozerellakaas
4 E mayonnaise (Meng die mayo en blatjang as smeersous saam)
2-3 E blatjang
Rooi gekaramaliseerde, balsamiese uie (Braai in pan met olyfolie, balsamiese asyn, bruinsuiker, peper en sout)

Groenpepersous:
2 t Groen peper korrels
2 t botter
125 ml meel
60 ml botter
sout
300 ml melk of genoeg om sous te maak 

Metode:
Vleis:
Maak ‘n heerlike vuur buite om die beste resultaat vir jou resep te kry. Indien jy dit binne die huis braai, kan jy die volgende stappe volg.

Voorverhit die riffelpan/plaat waarop jy die vleis gaan gaarmaak. Maak seker dit is vuurwarm, braai jou vleis ongeveer 4 minute aan elke kant.

Braaibroodjie:
Vir die braai broodjie, pak al die bestanddele bo-op die broodjie en smeer botter slegs aan die binnekant van die broodjie. Jy kan ook ‘n roosterplaat gebruik as jy dit in die kombuis gaarmaak, anders is die oop vuur jou beste opsie.

Groenpepersous:
Braai die groenpeperkorrels en 2 eetlepels botter saam, druk fyn met ‘n vurk. Plaas eenkant tot benodig. Smelt die botter en meel in die pan, voeg nou die melk bietjie vir bietjie by om gladde sous te vorm, laat kook op lae hitte tot sous verdik terwyl jy deugaans aanhou roer. Voeg die groenpeperkorrels by en laat prut vir nog paar minute. Gebruik die verpulper en maak seker al die korrels is fyn gemaal. Indien verkies, kan jy ‘n bietjie kaas of parmesaankaas byvoeg vir ekstra geur.

Bedien saam met jou plankie ribeye vleis en braaibroodjie. 

Boerie-Lasagne

Boerie-Lasagne

Plaat/ Oond Temperatuur: Medium en 180 grade
Aantal Porsies: 6 mense
Voorbereiding: 10 minute
Gaarmaak: 30 minute

Bestanddele:
4 t olyfolie 
1 pak boerewors / 500 g, uit die omhulsel verwyder
2 x 400 g blikkies geskilde, gekapte tamaties 
1 E bruinsuiker 
3 takkies tiemie
2 E blatjang
1 E Worcestersous
sout en varsgemaalde swartpeper, na smaak
1 x 400 ml sakkie Gekoopte béchamelsous of witsous 
1 x 250 g boks lasagne-velle 
100 g basiliekruidpesto 
100 g Cheddar, gerasper
100 g Mozzarella, gerasper
Parmesaan hardekaas, gerasper

Metode:
Verhit die olyfolie in pan. Braai die boerewors vir 5 minute of tot bruin. Breek dit in kleiner stukke op met behulp van ‘n houtlepel.  Roer die tamaties, suiker, tiemie en geurmiddels by. Laat prut liggies vir 10 minute, roer af en toe.  Voeg ‘n bietjie water by as die tamaties te veel verdik. 

Gebruik 'n oondvaste bak en pak die béchamelsous, boerewors, lasagnevelle en pesto in lae. Strooi met die Cheddar en Mozzarella en bak vir 15 minute of tot goudbruin en borrelend.  Sprinkel met die harde kaas en bedien met slaai, indien verkies.

Drie Tapas op ‘n bord

Drie Tapas op ‘n bord

Oond/ Plaat Temperatuur: Medium tot Hoog
Aantal Porsies: 6 mense

Bestanddele:
Maalvleis-balletjies:
300 g maalvleis
½ ui, fyn gekap
Sout & peper
1 E blatjang
1 E Worcestersous 
2 E Jimmy-sous, bygevoeg tydens braai
First Choice olyfolie vir braai in pan (Kan ook in oond gaargemaak word)
First Choice dubbel gewone jogurt
2 E pietersielie, fyn gekap

Metode:
Neem die maalvleis, voeg sout, peper, gekapte ui, blatjang en Worcestersous bymekaar en meng goed. Vorm klein balletjies, ongeveer teelepel hoeveelheid. Plaas die balletjies in pan en braai of jy kan dit ook in die oond bak op 180 grade vir ongeveer 8-10 min. Smeer die Jimmys-sous net voor opdiening oor vir ekstra kleur en smaak. Garneer met opgkapte pietersielie en gewone joghurt.

Peerstokkies:
2 Sagte en ryp pere in blokkies gesny (gebruik suurlemoen sodat die peer nie bruin verkleur)
Groot en vars roketblare
Brie-kaas in blokkies gesny
Bamboesstokkies
Balsamiese glaseersel
Neute om oor te sprinkel

Metode: 
Ryg al die bestanddele op jou stokkie, plaas op die bord en garneer met neute en balsamiese glaseersel. 

Oranje Soetpatat-happie:

2-3 Oranje soetpatats in sirkels gesny (vooraf sag gekook, maar steeds ferm)
Gladde maaskaas
1 Peer, in dun repies gesny (gebruik suurlemoen sodat die peer nie bruin verkleur)
Vars tiemieblare
Vars neute

Sous vir soetpatat:
1 vars en sagte peer, geskil en in blokkies gesny
60 - 80 ml olyfolie
30 ml heuning
Sout & peper na smaak
2-3 Vars tiemietakkies met blare
2 E botter
Paar ekstra tiemietakkies vir garnering

Metode:
Neem die bestanddele hier bo en sit in ‘n maatbeker, gebruik jou verpulper en verpulp tot ‘n gladde tekstuur. Gooi of kwas dit oor jou soetpatats wat op ‘n oondbakplaat geplaas is. Bak in die oond op 180-200 grade vir 10-15 minute of tot goudbruin.

Neem die afgekoelde soetpatats en plaas die maaskaas en peerskuifies bo-op, garneer met neute en tiemieblare. Jy kan van die oorblywende sous oor die patats gooi, asook swartpeper.

Dien op.

Bosveldslakke

Bosveldslakke

Plaat Temperatuur: Hoog
Aantal Porsies:  4 – 6 mense 

Bestanddele:

500-600 g beesfilet in stukke gesny 
(marineer met sout olyfolie en suurlemoensap) 

Knoffelsous:
80 -120 g botter 
2 E gewone meel
Sout na smaak
2 t fyn knoffel
250 ml room
125 ml – 200 ml volroommelk

300 g gemengde Cheddar- en Mozzarella-kaas
2-3 E Parmesaankaas
Basiliekruid-pesto 

Bruinbrood snytjies

Fyngekapte Pietersielie en swartpeper vir garnering

Metode:
Braai jou filetstukkies op ‘n warm plaat tot amper mediumgaar. Dit moet nog ‘n paar minute in die oond en dit word daar ook verder gaar. Plaas eenkant tot benodig.

Maak die witsous deur die botter in ‘n pan of pot te laat smelt.  Braai die knoffel saam vir ‘n minuut, voeg die sout en meel by en meng deur tot dit gebind het. Haal af van die plaat vir ‘n oomblik en voeg jou melk en room by die meelmengsel. Gebruik ‘n handklitser of ‘whisk’ om die meelmengsel tot glad te meng. Plaas terug op lae hitte tot die melkmengsel glad is. Hou aan roer tot die sous verdik en haal af. 

Die knoffel-roomsous moet redelik loperig wees, so jy kan nog melk byvoeg indien nodig. Haal af van die plaat en hou eenkant.
Plaas die vleis in die holtes van die slakbakkies. Sit ‘n halwe lepel pesto op elke stukkie en dan die knoffelroomsous. Gooi die gemengde kaas en parmesaankaas oor. Plaas in die oond op 200 grade tot kaas gesmelt is. 

Garneer met pietersielie en swartpeper en bedien saam met snytjies bruinbrood.

Murgpampoentjie en Camembert Sop

Murgpampoentjie en Camembert Sop

Plaat Temperatuur: Medium
Aantal Porsies:  4 mense

Bestanddele:
8 Murgpampoentjies
6 x Grasuie
1 ½ groen appel
1 k seldery
2 x 28 g ‘Knorr new Stock Pot’ aftreksel 
½ k pietersielie
2 t gemmer
250 ml room
15 ml suurlemoensap
Halwe Camembert

Garnering:
Neut- en saadmengsel
Pietersielie
Ciabatta knoffelbroodjie
Ekstra Camembert-skyfies

Metode: 
Braai die grasuie gemmer, seldery, groenappel en pietersielie. Laat stoom die murgpampoentjies in ‘n oondsakkie vir ongeveer 6 minute. Sodoende behou dit die groen kleur. 

Voeg die vloeistof in die pot en plaas die gestoomde murgpampoentjies ook daarin. Laat prut vir ongeveer 8 minute. Voeg die Camembert, room en suurlemoensap by. Gebruik ‘n voedselverwerker en verpulp die sop tot glad. Dien die sop op en garneer soos verkies of met die bestanddele hierbo genoem.

Lamskenkel-kerrie

Lamskenkel-kerrie

Plaat Temperatuur: Hoog
Aantal Porsies: 6-8 mense

Bestanddele:
800 g – 1 kg lamskenkels 
125 ml meel
Sout en peper
1 groot ui, fyn gekap
2 blikkies tamatie
1 k water of hoenderaftreksel (Hou vog dop kan nog byvoeg indien nodig)
1 blikkie klappermelk
1 pakkie Rajah “Dry cook in sauce” Butter Chicken 
1 E masala 
1 t Borrie
½ t vars gemmer
½ t vars knoffel
Ekstra Sout en peper na smaak
Vars tiemie of roosmaryn 

Opsioneel:
125 ml gewone jogurt of room

1 kg baba -artappels saggekook
125 ml botter
Olyfolie
Pietersielie, fyn gekap
Sout
6-8 vars knoffelhuisies

Vir garnering:
Vars pietersielie of koljander
Gewone Joghurt 

Metode: 
Meng die meel met sout en peper en rol die lamskenkels daarin.  Maak seker die vleis is goed bedek met die meel. Braai nou die skenkels in ‘n pan/pot of die braaibak wat  jy gaan gebruik tot dit verbruin. Voeg al jou water en ander nat bestanddele in die pot asook die kruie en speserye. Laat kook of oondbak die vleis vir minstens 3 ure. Hou net elke uur jou vog dop sodat jou vleis nie droog kook nie. Heel laaste voor opdiening kan jy, indien verkies, die jogurt of room byvoeg vir ekstra romerigheid. Bedien met gebraaide aartappels, rys of stampmielies.

Kook die baba-aartappels, vooraf in in water tot sag. Laat smelt olie en botter in ‘n pan saam met die platgedrukte knoffelhuisies. Voeg die aartappels by en laat dit op ‘n lae hitte braai vir ongeveer 10-15 min tot goudbruin en krakerig. Bedien saam met jou lamskerrie. 

Paasbolletjie Lamsburger

Paasbolletjie Lamsburger

Plaat Temperatuur: Hoog
Aantal Porsies: 6 mense

Bestanddele:
6 Paasbolletjies
6 snye gerookte kaas 
Camembert kaas
Mengsel van groen kraakvars blare (spinasie en kool fyn gesny) 
2-3 E Mayonaise
Rooipeper in repies gesny
Rooi ui in repies gesny
500 g lamsvleis
Sout en peper na smaak
2 t Kerriemengsel 
Olyfolie
Jimmy’s sous 

Metode:
Meng die gemaalde lamsvleis met sout, peper en kerriemengsel. Deel die vleis in ses dele en maak balletjies en druk dan plat in ‘n “pattie”. Verf met koskwas ‘n bietjie olie en Jimmy’s sous en braai op ‘n roosterplaat tot mediumgaar.  Indien jy dit goed gaar verkies, kan jy dit vir nog 8 minute op 180 grade in die oond sit. Hou eenkant en laat rus die patties tot benodig.

Neem nou die kraakvars blare, rooi uie en soetrissie en meng in groot glasbak met die mayonnaise. Sny die paasbolletjies en rooster die paasbolletjies aan albei kante. Plaas die blare onder, dan die pattie en dan die gerookte cheddar en camembert kaas. Plaas die bokant van die paasbolletjie op. Sit voor op jou bord.

Teriyaki Hoender-kebabs

Teriyaki Hoender-kebabs

Plaat Temperatuur: Hoog
Aantal Porsies: 6 mense

Bestanddele:
Ontbeende hoenderdye 
Rooi uie
Pynappelstukke
Gekoopte Teriyaki-sous
Sprietuie, fyn gekap
Sesamsaad
Dubbelroom gewone jogurt

Metode:
Marineer die hoender in die Teriyaki-sous vir 30 minute. Ryg die kebabstokkies met hoender, pynappel en rooi uie. Braai op ‘n warm roosterplaat tot goudbruin. Indien dit nog nie heeltemal gaar is nie, kan jy dit in die oond plaas vir ongeveer 8-10 minute op 180 grade. Net voor opdiening, smeer nog teriyaki-sous met ‘n koskwas oor die kebabs. Smeer die jogurt en een eetlepel vol oor die opdienbord as garnering, plaas die kebabs op die bord en sprinkel sprietuie en sesamsaad oor die kebabs. 

Sjokolade, Heuning- en Neutsirkels

Sjokolade, Heuning- en Neutsirkels

Bestanddele:
4 k sterk witbroodmeel
2.5 ml fyngemaalde kaneel
50 g ongesoute botter, in klein stukkies gesny
50 g strooisuiker
1 sakkie droë gis
1 eiergeel
120 ml water
60 ml melk
45 ml heuning
45 ml First Choice ‘caramel dessert topping’

Vulsel:
40 g ongesoute botter, gesmelt
4 E gladde maaskaas
50 g ligte muscovado (bruin) suiker
175 g donker sjokoladeskyfies
75 g gekapte neute (2 soorte van jou keuse) 

Metode:
Smeer 'n diep 23 cm pan. Sif die meel en kaneel in 'n bak en vryf die botter met jou vingerpunte in totdat die mengsel soos growwe broodkrummels lyk.

Roer die suiker en gis by. In 'n beker of bak, klits die eiergeel met die water en melk, en roer geleidelik by die droë bestanddele, met 'n rondelemmes, om 'n sagte deeg te maak.

Knie die deeg op 'n oppervlak wat liggies met meel bestrooi is tot glad en rol dan uit tot 'n reghoek van ongeveer 40 x 30 cm.

Vir die vulsel, smeer die deeg oral oor met die gesmelte botter en maaskaas en sprinkel eweredig met die suiker, sjokolade en gekapte neute.

Rol die deeg van een lang kant af op en sny in 12 skywe. Pak naby mekaar in die pan met hulle snykante na bo. Bedek en laat staan op 'n warm plek vir ongeveer 1½ uur tot goed uitgerys en veerkragtig. 

Voorverhit die oond tot 220 grade.

Bak vir 30-35 minute tot goudbruin. Haal uit die pan en laat afkoel op 'n draadrak. 

Smeer met heuning en ‘caramel dessert topping’ terwyl dit nog warm is. Trek sirkels uitmekaar om te bedien.

Grondboontjiebotter-truffel Kolwyntjies

Grondboontjiebotter-truffel Kolwyntjies

Voorbereiding: 40 min
Baktyd: 15 min + verkoeling

Bestanddele:
168 g wit baksjokolade, grof gekap
¼ k romerige grondboontjiebotter
2 E kakao

Beslag:
113 g botter versag
150 g suiker
2 groot eiers, kamertemperatuur
1 t vanielje-ekstrak
¾ k koekmeel
½ k kakao
½ t koeksoda
¼ t sout
½ k karingmelk
250 ml espresso

Versiersel:
84 g halfsoet-sjokolade, gekap
⅓ k room
3 E romerige grondboontjiebotter

Metode:
Vir Truffels:
Smelt sjokolade in die Mikrogolf teen 70 % krag vir 1 minuut en roer. Mikrogolf vir bykomende 10 tot 20 sekonde tussenposes en roer tot glad. Voeg grondboontjiebotter by en meng goed. Bedek en laat verkoel vir 15-20 minute of tot ferm genoeg om balle te vorm. Maak twaalf balletjies; rol in kakao en hou eenkant.

Vir Kolwyntjies:
Verroom botter en suiker in ‘n groot mengbak tot lig en donsig. Voeg eiers een vir een by en klits goed na elke byvoeging. Voeg vanielje by en meng deur. 

Meng die meel, kakao, koeksoda en sout. Voeg geleidelik by geroomde mengsel om die beurt met karringmelk en koffie en meng goed.

Vul 12 papier-gevoerde muffin-pannetjies twee derdes vol. Plaas ‘n truffel in elkeen en moet dit nie afdruk nie. Bak by 180 grade totdat 'n tandestokkie wat in koekgedeelte gesteek word skoon uitkom. Dit behoort so tussen 15-20 minute te wees. 

Laat afkoel vir ongeveer 10 minute voordat jy dit van die pan na 'n draadrak verwyder word om heeltemal af te koel.

Smel die sjokolade met room in 'n swaar kastrol oor lae hitte terwyl jy aanhoudend meng.  Verwyder van die hitte; roer grondboontjiebotter by tot glad. Gooi die mengsel oor na 'n kleiner bak; laat afkoel tot dit ‘n smeerkonsekwentheid bereik. Versier kolwyntjies en stoor in die yskas.

Bees-filet met rooiwyn-bessiesous en Fondant-aartappels

Bees-filet met rooiwyn-bessiesous en Fondant-aartappels

Plaat- en Oond-temperatuur: Hoog
Aantal Porsies: 4-6 mense

Bestanddele:
Vleis:
6 filet-medaljes
Sout en peper
Olyfolie

Basiliekruid-pesto
Vars vye
Vars Swartbessies
Vars tiemieblare

Fondant-aartappels:
6-8 medium Aartappels (Kook dit vooraf sag indien verkies -verkort jou kookproses)
200 g ongesoute botter
30 ml olyfolie
Vars roosmaryn
Vars tiemie
8-10 Knoffelhuisies
Sout en peper
Een blokkie hoender of groente aftreksel in 250ml water

Sous:
250 ml rooiwyn
1 rooi ui, fyn gekap
80 ml First choice Bessie dessert topping (enige ander Bessie puree sal ook werk)
Sout en peper
2 E meel met bietjie water om sous te verdik

Metode: 
Neem jou filet-medaljes en geur met olyfolie sout en peper, braai op warm plaat aan albei kante tot mediumgaar. Laat jou filet rus vir ongeveer 5 minute voor opdiening.

Vir jou fondant-aartappels, skil die aartappel en sny kante van die aartapel plat. Sou jy verkies kan jy die aartappels sag kook in water, dit sal jou kookproses redelik verkort. Maak die olie in jou pan warm, op lae hitte. As dit warm is, plaas die aartappels in jou pan, met plat kant na onder. Braai vir ongeveer 5-7 minute aan elke platkant tot goudbruin. Dan kan jy die botter in die pan plaas. Gooi ook die knoffel, roosmaryn en tiemie in die pan en geur goed met sout en peper. Gooi die hoender- of groente aftreksel versigtig in die pan. Wees versigtig dit mag dalk spat met die botter in die pan. Plaas die deksel op en laat dit prut vir ongeveer 20 minute indien vooraf sag gekook. Indien nie, sal jou kookproses langer neem, tot aartappels sag is.

Vir die rooiwyn-bessiesous, kan jy die uie in bietjie olie of botter braai tot sag, voeg dan die rooiwyn, bessiesous, sout en peper by. Om die sous te verdik kan jy die meelmengsel bygooi en oor stadige hitte laat prut vir 5 minute. Gebruik ‘n verpulper om jou sous tot ‘n gladde tekstuur te kry. (Die sous kan vooraf gemaak word.) 

Nou kan jy die bord opdien volgens jou voorkeur of gebruik die foto as verwysing vir opdiening. 

Krap- en Garnaalslaai

Krap- en Garnaalslaai

Plaat en Oond Temperatuur: Hoog
Aantal Porsies: 6 mense

Bestanddele:
300 g ‘crabsticks’
300 g skoon garnale 
1 suurlemoen
3 E knoffelbotter
2 E pietersielie, fyn gekap

Mayonaise:
1 eiergeel
1 E vars suurlemoen
1 t witwynasyn 
Knippie sout
1 t Dijon-mosterd
125 – 200 ml olyfolie

Slaai:
2 groen appels in repies gesny
2-3 avokado’s
200 g mikrokruie of klein slaaiblare
Paar dille-takkies

Kaasmandjie:
1 Blok Hardekaas soos parmesaan of edamkaas 

Metode: 
Maak seker jou seekos is ontvries voor jy dit gaarmaak, anders vorm dit te veel water. Braai die garnale en ‘crabsticks’ (1 ‘crabstick’ in 4 dele gesny) in ‘n warm pan met botter, suurlemoen en vars pietersielie tot gaar. Hou eenkant tot benodig.

Vir die kaasmandjies kan jy ‘n groenteskiller gebruik en lang repies maak en dit in ‘n vierkant op ‘n bakplaat en bakpapier plaas. Sit dit in die oond op ‘n hoë temperatuur, 200 grade, en laat die kaas smelt tot amper goudbruin. Sodra die kaas reg is, haal uit die oond en gebruik ‘n eierspaan om dit op te tel en vorm dit rondom ‘n sousbotteltjie wat plat lê. Pasop dit is baie warm en sodra dit afkoel kan die kaas nie meer buig nie. Laat dit heeltemal afkoel en jou kaasmandjie of rolletjie sal so bly.

Vir die mayonnaise, gooi die eiergeel, suurlemoensap, asyn, sout en mosterd bymekaar. Klits goed en voeg die olyfolie bietjie vir bietjie by terwyl jy aanhou klits tot ‘n stywe mayonnaise vorm.

Berei jou slaai voor en hou eenkant.

Neem nou al jou elemente en plaas dit op die bord volgens jou keuse. 

Oop Soutbeesvleis-Broodjie

Oop Soutbeesvleis-Broodjie

Aantal Porsies: 6 mense

Bestanddele:
Vleis:
1 Groot Spar ‘T&T Salt Beef’
4 Selderystokkies
2 Wortels
1 Groot ui, in kwarte gesny
3 Lourierblare
Sout en peper na smaak

Ander bestanddele vir broodjie:
6 Ciabatta Baguettes
First Choice gladde maaskaas
2 Uie, in halwe ringe gesny en gekaramaliseerd
1 Komkommer in linte gesny (gebruik jou groenteskiller)
125 ml Granaatpitte
1 pakkie Bronkors (Watercress) 

Sous:
80 ml Mayonnaise
125 ml First Choice gewone dubbelvet-jogurt  
30 ml Olyfolie
Swartpeper en sout
2 t Mosterd (gewoon of korrel)
2 E Heuning

Metode:
Plaas die vleis en ander bestanddele in ‘n diep pot, bedek met water en laat kook vir ongeveer 2-3 ure, afhangende van die grootte van die vleis. Laat afkoel en sny in dun skyfies. 

Vir die sous meng jy al die bestanddele saam en plaas eenkant tot benodig.

Plaas die baguette in die oond teen180 grade vir ongeveer 5 minute net om lekker warm en vars te wees.

Om die broodjie te bou, sny dit oop, gebruik die maaskaas as smeermiddel. Plaas die vleis in die broodjie, dan die gekarameliseerde uie, sous, komkommerlinte, bronkors, granaatpitte met sout en peper vir afronding.

Bedien volgens jou keuse.

Peuselhappies

Peuselhappies

Aantal Porsies: 4-6 mense

Bestanddele:

Klein Glasbotteltjies:
- Groen olywe
- Rosa tamaties
- Tandestokkies
- Feta in blokkies gesny
- Teelepelpunt basieliekruid-pesto

Peuselhorinkies:
- Salami
- Salami-stokkies
- Soutbeskuitjies
- Groen olywe 
- Pers/swart olywe
- Agurkies
- Vars roosmaryn 
- Camembert kaas
- Droë Broodstokkies

Peuselhappie-bootjies:
- Droëwors
- Neute
- Vars vye 
- Vars swartbessies
- Ronde pretzels
- First Choice Baby Gouda en Cheddar

Metode:
Pak al die lekkernye op jou bord of houertjies soos jy verkies en volgens jou eie voorkeur.

Rump Pita of Hamburger

Rump Pita of Hamburger

Plaat en Oond Temperatuur: Hoog
Aantal Porsies: 4 mense

Bestanddele:  
1 verouderde rump van Spar
Sout en peper
Olyfolie
1 vars suurlemoen
1 bakkie First Choice gladde maaskaas
1 pakkie roketblare
2 hande vol rooikool, fyn gekap
1 First Choice Camembert kaas
2 groot rooi uie, 
Balsamiese asyn
60 ml mayonnaise
2 t Verde-sousmengsel van 3 vars kruie, sout, peper en olyfolie - (koop sommer by Supermark as jy dit nie self wil maak) 

Metode: 
Berei die vleis voor met olyfolie, suurlemoen, sout en peper. Braai op ‘n vuurwarm plaat of pan vir 4 min aan beide kante sodat die vleis steeds pienk en mediumgaar vertoon. Laat jou vleis ‘n paar minute rus voor jy dit in repies sny.

Sny die rooi uie in ringe, braai in bietjie olyfolie tot gaar. Voeg sout en peper na smaak by en voeg laastens die balsamiese asyn by en laat dit daarin braai. Hou eenkant tot benodig.

Sny jou pita of hamburger oop en maak dit warm of rooster op die plaat vir ‘n paar minute. Gebruik die maaskaas as ‘n smeermengsel en smeer op die brood of aan die binnekant van die pita. Gebruik die roket en rooikool as bed vir jou vleis.

Sny die camembert in repies. (Dit sny makliker as jy dit verkoel hou in die yskas tot net voor opdiening). 
Die mayo en verde-sous word net saam gemeng en hou eenkant tot benodig.

Pak die pita of hamburger volgens jou keuse en voorkeure met al die bestanddele bo-op mekaar en bedien.

Vis en Aartappelwiggies

Vis en Aartappelwiggies

Plaat- en Oond-temperatuur: Hoog en 200 grade
Aantal Porsies: 4-6 mense

Bestanddele:
1 pak bevrore ertjies
2 wiele feta
Sout en peper
2 E botter

4-6 medium aartappels
Aartappelspesery 
Olyfolie 

1.2 kg stokvis
2 k rysmeel of aartappelmeel (jy koop dit by die gesondheids-afdeling in die supermark of gewone koekmeel werk ook – jou degie gaan dan net meer dig wees)
10 ml bakpoeier
1 eier
15 ml visspesery
Sout en peper na smaak
125 ml ekstra meel
1 bottel donker bier

2 suurlemoene in wiggies gesny
Grasuie vir garnering

Metode:
Laat ontvries die ertjies, verhit in die mikrogolf en krummel die feta bo-oor. Voeg botter by en druk dit fyn met jou aartappeldrukker. Hou eenkant tot benodig.

Sny die aartappels in wiggies en kook sag. Pak uit op ‘n bakplaat en strooi aartappelspesery, olyfolie en sout oor. Bak in die oond teen 200 grade vir ongeveer 20 minute tot goudbruin.
Laat die vis ontvries sodat al die water uit is. Meng die meel, visspesery, bakpoeier, sout en peper goed en voeg die eier en net genoeg bier by sodat dit ‘n ietwat loperige doopmengsel vorm. Jy gaan nie die hele bier gebruik nie, so gooi bietjie vir bietjie by totdat jy die regte loperige mengsel verkry. Dit moet steeds dik genoeg wees om ‘n lagie om die vis te vorm. 

Doop eers die vis in die 125 ml droë meel en dan in die loperige mengsel. Maak seker die pan met vlak olie is warm genoeg en braai aan albei kante tot gaar. As jy wil seker maak die vis is gaar of die braaitydperk in die pan wil verkort, kan jy die vis vooraf stoom, sodoende verkort die kookproses in die pan en braai jy slegs die degie tot goudbruin en gaar. 

Plaas al die elemente in jou bord en geniet dit.  

Hoender- en Murgpampoentjietert

Hoender- en Murgpampoentjietert

Oond Temperatuur: 200 grade
Aantal Porsies: 4 mense

Bestanddele:
1 pak skilferkors (puff pastry)
1 eier
1 pak Spar mini hoenderborsfilette
1 E Sojasous, 
Sout en peper
2 E Suurlemoensap
2 E Olyfolie
1 pakkie murgpampoentjies
1 bakkie roomkaas of maaskaas
2 wiele Feta
Grasuie, fyn gekap

Metode:
Laat ontvries die skilferkors, rol uit, sny dun repies van elke kant af en sit weer bo-op die kante van die skilferkors om ‘n raampie te vorm. Plaas op ‘n bakplaat met bakpapier en smeer die skilferkors met geklitse eier.  Bak teen 200 grade tot gaar. Plaas eenkant tot benodig.

Meng die roomkaas en die feta tot ‘n gladde tekstuur. Smeer dit op die gebakte skilferkors. 

Laat marineer die hoender in die sout, peper, suurlemoensap, olyfolie, en sojasous en maak dit gaar op ‘n roosterpan. Plaas die hoender eweredig verspreid bo-op die gesmeerde kaasmengsel. 

Was die murgpampoentjies en gebruik jou groenteskiller om linte van die heel murgpampoentjies te sny. Rol die linte op en plaas bo-op die skilferkors tussen die gaar hoenderstukkies.
Sprinkel met grasuie, sout en peper en ‘n bietjie olyfolie en bak in die oond vir ‘n verdere 8-10 minute tot goudbruin en gaar.

Sny in stukke en bedien volgens jou keuse.

Geroosterde Groente ‘Poke Bowl’

Geroosterde Groente ‘Poke Bowl’

Temperatuur: Hoë hitte
Aantal Porsies: 6-8 mense

Bestanddele:
Groente:
Vars en gaar beet, (ongeveer 6 bolle)
2 wiele feta, in repies gesny
1 pakkie sampioene 
1 pakkie mini eiervrug
1 pakkie baba murgpampoentjies
1 pakkie gesnyde botterskorsie, saggekook
1 pakkie skoongemaakte blomkool

Metode:
Pak al die groente op ‘n bakplaat en voer uit met bakpapier. Gooi sout, peper of groente-spesery oor en sprinkel genoeg olyfolie oor al die groente. Plaas die groente in die oond en laat rooster tot goed gaar op 200 grade vir ongeveer 25 minute. Hou eenkant tot benodig.

Ander bestanddele:
1 koppie Quinoa, gaar gekook soos op pakkie se aanwysings met ‘n bietjie gekapte pietersielie, ‘n eetlepel botter en sout.
1-2 pakkies Halloumi, in repe gesny en gebraai op jou roosterpan, plaas eenkant tot opdiening.

Sous:
80 ml olyfolie
1 t sojasous
Sap van 1 lemmetjie
30 ml balsamiese asyn
2 E heuning
Sout en peper
Meng alles saam. 

Opdiening:
Pak al die gaar bestanddele in rye en in die rondte van jou opdienbakkie of bord en garneer met ‘n vars kruie en bedruip met die sous. 

Kasslertjops- en Mangoslaai

Kasslertjops- en Mangoslaai

Stooftemperatuur: Hoë hitte
Aantal Porsies: 4 mense

Bestanddele:

6 Kassler-tjops

Marinade vir Kassler-tjops:
1 t sojasous
60 ml ‘First Choice Passion Fruit Dessert Topping’
20 ml heuning
20 ml olyfolie
Sap van ½ suurlemoen
1 t mosterd
½ t growwe swartpeper

Metode:
Meng alles saam, smeer oor die vleis en laat staan vir ongeveer 20 min of jy kan dit vooraf ook marineer en in yskas plaas. Braai die vleis op jou roosterplaat tot gaar aan albei kante en laat afkoel, Sny in repies en hou eenkant tot benodig.

Slaai-bestanddele:
1 Pakkie Baba spinasieblare
2 groot Mango’s (Vervang Mango’s met droë appelkose of perskes indien verkies)
125 ml gedroogte Bosbessies (Cranberries)
125 ml Pistasieneute
1 E Dille, fyn gekap
1 vars granadilla

Metode:
Meng al die bestanddele in ‘n glasbak en voeg die vleis by. Bedien op ‘n bed van spinasieblare met gemaalde swartpeper oor. 

Bobotie Pizza

Bobotie Pizza

Oond / Stoof Temperatuur: Hoë hitte
Aantal Porsies: 3- 4 mense

Bestanddele:  

Pizzadeeg:
1 pakkie kitsgis 
¾ k louwarm water vir die gis
½ E suiker
2 k koekmeel
¾ t sout
½ t suiker

Metode: 
Gooi die louwarm water in ‘n mengbak, maak seker die bak is ook louwarm (as jou mengbak koud is bring dit dadelik die temeratuur van jou water af na koud en dit het ‘n invloed op die gis). Meng die suiker en die pakkie kitsgis met die water. Laat die brousel vir so 5-7 minute staan en ontwikkel.  Voeg die meel stadig by en laat die menger sy werk doen todat dit ‘n bal gevorm het, of knie vir 5-8 minute lank met jou hande. Laat die deeg rus todat dit verdubbel het in grootte, knie af en rol uit tot verlangde grootte.

Tamatiebasis:
1 blikkie tamaties 
1 mediumgroot ui
Sout en peper
30 ml tamatiesous
30 ml blatjang
10 ml bruinsuiker
Bietjjie olie vir uie

Metode: 
Braai die uie tot goudbruin, voeg al die ander bestanddele saam en laat kook vir ongeveer 5 minute op mediumhitte.
Neem ‘n voedselverwerker of verpulper en maak seker jou tamatiesmoor is glad met geen groot stukke daarin nie.

Bobotie-maalvleis:
300 g beesmaalvleis
1 medium ui, fyn gekap
Handvol droë bosbessies (cranberries)
1 pakkie Knorr Bobotie geurmengsel
30 ml blatjang 
10 ml tamatiesous
 
Metode:
Braai die ui tot goudbruin., voeg die maalvleis by asook al die ander bestanddele en braai en laat prut tot gaar.  Plaas die bobotie eenkant tot benodig.

Vir die maak van die Pizza:

Bestanddele:
- Pizzadeeg, uitgerol
- Tamatiebasis
- Mengsel van Mozerella- en Cheddar-kaas, gerasper
- Origanum 
- Bobotie vleismenggsel 
- Vars koljander
- Gevlokte amandels

Metode:
Smeer die tamatiebasis oor die uitgerolde rou pizza deeg. Gooi genoeg kaas oor en dan gooi jy van die origanum oor en heel laaste sprinkel jy van die bobotie vleis oor. Gebruik die vars koljanderblare en gevlokte amandels met swartpeper as garnering. 
Copyright © Ontbytsake 2022 - All rights reserved.  |  Privacy Policy  |  Terms & Conditions