Onafhanklike Kunstenaars: Kliek hier om in te skryf vir die Aitsas 2024!

fliektydSake

Leon van Nierop gesels oor die nuutste flieks op die Silwerdoek en bespreek ook reekse en dokumentêrs wat op ander platforms te sien is.

fliektydSAKE met Leon van Nierop

Leon van Nierop het op 6 April in fliektydSAKE gesels oor 'Tracking Thabo Bester. Hierdie veelbesproke dokumentêr vlek die waarheid dramaties oop en is onderhoudend en visueel vaartbelyn. Dit bring veral hulde aan goeie joernaliste en dapper fluitjieblasers sonder wie se integriteit die waarheid verborge sou bly. Bester het kamtig in sy tronksel uitgebrand terwyl hy met die hulp van tronk-owerhede wat omgekoop is, ontsnap het. 

Leon het ook gesels oor Godzilla vs Kong: The New Empire. Dis, volgens Leon, 'n titaniese monster-slaai met spesiale effekte wat jy nie eers in Dune Part 2 gesien het nie. ‘n Klou uit die sand en ‘n tsunami wat die stert van ‘n reuse-likkewaan verberg, oorweldig die sintuie. Maar Kong hou darem van mense. Moenie bekommerd wees dat jy die storie sal verloor tussen al die lawaai nie. Dis so oorweldigend dat jy saam met die stroom sal vloei.

Artikel

Leon van Nierop se Top Tien Goedvoel-Flieks

Geskryf deur
deur Leon van Nierop

Leon van Nierop se Top Tien Goedvoel-Flieks

“VOEL GOED VROLIKHEID”

kykSAAM

As beurtkrag jou kniehalter om Saterdae te kyk, daar is heelwat herhalings van die program op kykNET en kykNET & kie en ons YouTube kanaal.

1)    Mamma Mia!
Nie alleen sal jy saamsing en -dans nie, die skoonheid van ‘n Griekse eiland, pragtige mense wat foute maak, liefde, hoogskop en lekker Griekse kos op die maat van ABBA! sal jou laat bokjol! 
2)    Love Actually
Hierdie romantiese Kersfeesfliek oor 9 paartjies wat die spoor byster raak en mekaar dan al singende en dansende weer op die lyf loop, is pas in teaters heruitgereik. Dit sal jou laat lag, huil en verlief maak op die eerste person wat jy sien!
3)    Wonka
Jy kan nie tans beter kry as die storie van Willy voor hy Willie Wonka geword het wat sy sjokoladefabriek probeer begin het nie. Dié slag begin hy die fabriek met teenstand van die snaaksste groep karakters ooit!
4)    Toy Story 3
Die derde fliek in die reeks oor Woody, Buzz, Lightyear en die ander speelgoed laat jou hart vla pomp van skone lekkerkry. Wees verseker van ‘n traan in jou oog en ‘n glimlag om jou bakkies. En oulike speelgoed. 
5)    Paddington 2
Hierdie is seker een van die mooiste kombinasie van animasie en lewendige aksie-flieks wat ooit gemaak is. Die lieftallige Paddington Bear probeer sy tante se gesteelde geskenk terugkry met kostelike gevolge. Meesterlik!
6)    Legally Blonde
Die verwaande, petieterige Elle Woods beland in ‘n regsfakulteit en probeer bewys dat daar meer in haar steek as net haarsproei en lipstiek. Sy val haar nerwe flenters van haar hoë hakkies af. 
7)    Barbie
Een van die gewildste flieks ooit gaan oor Ken en Barbie, twee poppe wat skielik in die werklikheid beland en moet oorleef met histeriese gevolge, maar tog ook ‘n diep boodskap.
8)    How to Train Your Dragon
Praat van oorspronklik! ‘n Jong Viking neem ‘n troetel-drakie aan en maak vriende met hom. Nou moet hy hom net oplei en nie opgeëet of verbrand word nie!
9)    Four Weddings and a Funeral
As hierdies romantiese verhaal met hartseer ondertone jou nie laat gil van die lag en jou hart warmer laat klop nie, het jy nie ‘n hart nie! ‘n Vasbeslote enkelloper ontdek gedurende vyf geleenthede dat hy wel verlief kan raak.
10)    A Man called Otto
‘n Suurknol wat nie meer kans sien om voort te gaan net die lewe nie, herontdek liefde en mededeelsaamheid deur homself bloot te stel aan die heerlikheid van die lewe en onselfsugtigheid. 

Kyk saam met ontbytSAKE hoe vandag se fliektydSAKE ander SAKE beinvloed.

Vind meer uit oor ander SAKE en sien waarmee ontbytSAKE besig is.

onsGEMEENSKAP

Bly op hoogte van ons doen en late